 |
Kumpulan Syair Aceh
TENTANG PENCEGAHAN WABAH COVID-19
Meucaè (bersyair) merupakan budaya Aceh yang sudah sejak lama digunakan untuk menyampaikan pesan dengan lantunan kata-kata bersajak dan berirama. Biasanya syair diciptakan secara spontan seketekika ketika penyair beraksi. Ia akan bersyair berdasarkan acara yang ia hadiri, keadaan sekitar yang ia lihat, ia dengarkan dan suasana yang ia rasakan. Tidak jarang pula ia menambah referensi dari obrolan-obrolan ringan dengan orang-orang yang hadir lainnya sebagai sumber informasi. Meskipun pelakunya sudah sangat sedikit jumlahnya, tradisi lisan ini masih sering dihadirkan dalam upacara adat dan tradisi di masyarakat, seperti pernikahan, sunnat rasul bahkan dalam upacara khanduri laot (kenduri laut).
2020 menjadi tahun yang paling memprihatinkan setelah Tsunami meluluhlantakkan Aceh. Sekarang wabah Corona Virus Disease 2019 (Covid-19) menyerang. Penyebarannya yang sangat cepat mengharuskan masyarakat untuk meningkatkan kewaspadaan. Segala upaya dilakukan untuk memberi pendidikan kepada masyarakat bagaimana mencegah penularan wabah ini. Para penyairpun ikut andil merangkai syair untuk disampaikan secara daring. Keresahan dan kegundahan penyair pun tergambar di dalamnya serta merujuk pada himbauan agar membantu memutuskan mata rantai penyebarannya dengan cara yang sekiranya dapat dilakukan, mulai dari diri sendiri, keluarga dan lingkungan sekitar
Seri Informasi Budaya kali ini merangkum dan mentranskrip lantunan syair-syair itu. Diketuai oleh Cek Medya Hus, Sanggar Seni Seueng Samlakoё menghadirkan syair-syair Aceh tentang pencegahan wabah Covid-19 untuk kita semua. [ehz]
SALEUM
Assalamuꞌlaikum kawôn meutuah
Jeut jeut daerah sinoё ngon sidéh
Saleuem mulia bina ukhuwah
Ngön mi dan ayah blah noё ngön blah déh
Lheueh ta meusaleuem ta kheun di babah
Tapujoё Allah wahé e waréh
Nyang peujeut tanyoё bumoё nyang luah
Langèt nyang indah meulapéh lapéh
Wajéb tasyukur keu sidroё Allah
Rahmat meutamah sinoё ngön sidéh
Niekmat ka geubi jeutsi meulimpah
Wajéb tiep saꞌah surôh tapatéh
Seulaweuet saleuem tanyoё kheun beupah
Keu Rasulullah wahé e waréh
Nabi Muhammad Muekjizat limpah
Umat geupapah peuji′ôh paléh
Deungön sahabat meuhat ta tamah
Keluarga Rasulullah ta ingat meucéh
Dan lom Ulama beuna jeut saꞌah
Ureueng peuleumah brôk got ngön paléh
Seulawuet saleuem takheun di babah
Bèk salah salah deungön haté gléh
Beureukat Muhammad umat geupapah
Ta turi nyang pah hitam ngön putéh
Di po cémpala ateueh bak panah
Di po tiwah ateueh bak kandéh
Lôn himpôn caé rawé saboh bhah
Teuntang musibah sinoё ngön sidéh
Teuntang virus (covid 19) si kureueng blah
Nyang ka meuwabah nanggroё nyoё ngön jéh
Sampé bak tanyoё jinoё ka leumah
Le ureueng reubah isolasi keudéh
Ulô meupakat ngön sahbat bagah
Lam komunitas, rakan teumuléh
Yue peugot caé rawé beu bagah
Bak rakan sahbah haba yue rintéh
Kepedulian seniman karangan kisah
Sosialisasi cegah virus ta langgéh
Lam bahsa sastra haba meupeugah
Seni daerah bèk sampé jayéh
Bak BPNB oké geupeugah
Geutém peuluwah ceutak ju keudéh
Beujeut bacaan lam bahsa daerah
Le that paedah wahé e waréh
Ètnoe keuh haba bak mula kisah
Bak muqaddimah saleuem phôn tuléh
Pat na salahan rakan meutuah
Beu neu peumeuꞌah deungön haté gléh
Sekian Dari : Cek Medya Hus
VIRUS CORONA
Pantôn Medya Hus
Sayang boh kayèe himbèe jak seuba
Habéh ubéna mandum jikuran
Bak masa sijoё paloё lagoё na
Meumacam rupa dum kejadian.
Batèe di gunöng teuglong teupula
Jinoe le cupa cok keu bangunan
Rata jeut nanggroe meuproe berita
Virus bahaya meulanda insan.
Ateueh bak rambôt meulôt cémpala
Sampé patah pha rhôt yub bak asan
Nyang cukôp ngeri terjadi kana
Virus corona ka ban saboh nyan.
Di công bak panah tiwah meudôda
Di công bak sala na eungkong kawan
(Covid 19) sikureueng blah wabah bahaya
Menular sigra bagah hana ban
Asèe di meudrôh riyôh lagoe na
Keunöng geulawa ka leumbam badan
Bahaya virus deuh phôn di cina
Maté manusia di kota Wuhan.
Angèn di laôt ribôt meubura
Geulumbang raya kapai di peulham
Virus that parah wabah bahaya
Όh keunöng sigra laju meutimphan.
Matèe bak kayèe teuntèe khueng raya
Peue lom lam rimba lagèe lapangan
Keubit that ganjé maté ngon sigra
Dalam berita meunan siaran.
Sayang gue peuték di reulék rata
Lurôh dum rata buet eungkong kawan
Sehingga jinoe jeut sagoe kana
Sampé india kana virus nyan.
Hanyöt dum kayèe watèe ie raya
Reuleueng dum bungka sayang hana ban,
Rata jeut sagoe jinoe waspada
Gabuek jeut kota anti virus nyan.
Musém khueng padé maté dum rata
Dalam blang raya angöh saboh nyan
Ureung nyang ban trôk, trôk bak bandara
Kajipareksa nyan kesehatan
Moto di meupok dok peugah haba
Supé that subra lalè bak jalan,
Nyang brat meukaleueng cit ureueng cina
Laju paréksa peuna virus nyan.
Sayang boh u kè tubè jak seuba
Goh lom got tuha habéh jikuran,
Meupeue peunyakét ayéb lagoё na
Virus corona ka kejadian.
Na aneuk gôt gôt karhôt udônya
Lam uteun raya ka meuruwa tran,
Na cit nyang peugah wabah di cipta
Alèh nyo beuna ta teupeue pih tan.
Meunyo jak uglé beu hasé gisa
Bèk dalam rimba sisat di sinan,
Meunyö tapiké wahé syédara
Nyan sabôh tanda cit kutôk Tuhan.
Nyo takoh kayèe teuntèe bahaya
Su uem lam dônya sengsara insan,
Karna Islam nyan di inanya
Nyan saboh bala keunöng serangan.
Angèn di laôt ribôt lagoe na
Ujeuen pih raya ka ban saboh nyan
Peunyakét ta eun jameun kon kana
Nyan saboh bala neubi lé Tuhan
Patah dheun kayèe meuseubèe kala
Patah dheun jeumpa keunöng bak sabah
Jinoe geutanyoe taceugah beuna
Pakriban cara jiôh virus nyan
Tacok boh kuyuen taguen sie rusa
Leupah meurasa mangat hanaban,
Tacok iktibal lé tanyoe dumna
Kejadian lam dônya saboh peringantan.
Peu ék geulayang dalam blang raya
Riyôh ngon subra ta eu di sinan,
Meunyo bit jahé kale lamdônya
Allah Taꞌala geujôk ganjaran.
“Mari geutanyoe jinoe waspada
Dan lom syédara beukong that iman
Peue nyang terjadi nyan bi Rabbana
Maha kuasa sidroe Ya Tuhan.”
Pengarang : Medya Hus
CAÉ COVID 19
Oleh : Cek Medya Hus
Pujoё keu Tuhan Alhamdulillah
Nyang Maha meugah maha Kuasa
Seulaweuet saleuem keu Rasulullah
Nabi nyang meugah pang ulèe dumna
Seureuta sahabat meuhat nyang meugah
Lheuh nyan meutamah ngön keluarga
Para Ulama beuna jeut sa′ah
Nyang bi ijzah ilmèe lam dônya
Deungon rahmat Po sidroё ya Allah
Rahmat meutamah sehat anggota
Ék lôn keumarang bah kadang susah
Ngön izin Allah hꞌan sapeue mara
Sayang keu didi gaki kapatah
Di yub bak nipah eumpeuen di mita
Na bacut caé lôn rawé kisah
(Covid 19) sikureueng blah, virus corona
Mulai meulanda di cina wabah
Sehingga luwah ban saboh dônya
Le that nyang maté meugulé punah
Le ureueng gundah lam harô hara
Meunyö yôh jameun taꞌeun geupeugah
jinoё jikheun sah virus corona
Le ureueng takôt ribôt meuleumpah
Jeut nanggroё susah jinoё meulada
Katrôh bak tanyoё keunoё meuwabah
(Covid 19) sikureueng blah di indonesia
Sampé u acèh ka tupèh wabah
Lé pemerintah atôran geupeuna
Untuk atasi bèk lé trôh wabah
Cara ta teugah bak dokto kana,
Jaga kesehatan badan beugagah
Jaroё beutarah tasabôn rata
Tajaga jarak emak ngön ayah
Bak ramè jeulah bèk tanyoё teuka
Tapakèk masker beuteutôp babah
Na lom geupeugah mumat jaroё bèk na
Untuk koh rantai virus meuwabah
Jinoё ka jeulah atôran geupeuna
Peupré sikula seureuta kuliyah
Hubungan daerah peuputôh sigra
Meunan cit teuma kantô pemerintah
Lam aktifitas nyang peunténg saja
Tôp warông kupi jeutsi bèk peuhah
Lheueh nyan geupeugah bèk peugot acara
Ureueng meukawén meuchén ka jatah
Όh lheueh meunikah hanjeut na pesta
Khanduri laén dan panggông ceuramah
Hajeut geupeugah jak jak wisata
Taduek di rumöh dak mèhmöh susah
Nyö ka peurintah siat tasaba
Peue lom oh malam nyan ka peurintah
Bèk lé meulangkah ho ho nyang hawa
Nyang ureueng jamèe teuntèe ban langkah
Ubak peutugah jak lapur sigra
Peue lom ban geuwoe nanggroe eropah
Kadang cit wabah bak gobnyan kana
Untuk hindari jeut si taceugah
Patéh meutuwah seruan bersama
Pihak kesehatan nyan kerja tugah
Tangani wabah fasien derita
Nyang ka odp saré jeuet saꞌah
Ladôm geukeubah geukarantina
Positif aktif nyan dokto tugah
Bak tanyoe ayah dukungan beuna
Deungö informasi nyanpi beujeulah
Bèk patéh bagah haba tan beuna
Nyang haba hoax bèk jak peuluwah
Berita tan jeulah bèk tapeucaya
Dan bacut saran lôn tuan peugah
Cara perintah beubijak sana,
Beuna solusi pakriban ulah
Di pemerintah geupiké beuna
Rakyat hꞌan jeut jak hai pak meutuwah
Mita nafakah pakriban cara
Meunyö nyang kaya hana masalah
Na peue geukeubah teubai beulanja
Teutapi meunyö meupunyö susah
Ureueng tueng upah mita beulanja
Pakri ban cara ta tangani pah
Seulama musibah tapiké beuna
Bandum geutanyoё lam bumoё Allah
Seunang ngön susah pasti tarasa
Ikôt atôran nyan peunténg leupah
Kebijakan perintah pih di utama
Bé na atôran rakan meutuah
Cara ta ceugah saboh usaha,
Tapi hakikat meuhat bak Allah
Tanyoё meutuah hꞌan trôh taduga
Virus corona nyang ka meuwabah
Saboh musibah dari nyang kuasa
Mungkén bak akhé lahé deuh leumah
Saboh hikeumah dari nyang kuasa
Mungkén geutanyoё jinoё hai ayah
Ka le that salah di dalam dônya
Ta eu kawôm droё di eungkhoё jajah
Saboh bismillah hꞌan ta meudô′a
Ta eu Masjid nacit meunasah
Han tém jama′ah bak kaffee subra
Maksiet dum dikeue hanpeue tapeugah
Han tatém teugah peujiôh mungka
Le that tapubuet jeuheut dum salah
Pemimpin serakah dermawan hana
Rakyat ngön kawôm ladôm tertindas
Agama Allah tan soё peuraya
Saboh agama ta meurô darah
Tameuparikah kadang saboh ma
Hasut peusuna hina ngon hujah
Di ateueh peuntah caci Ulama
Mandum nyang katrôh meusa′ôh susah
Rata daerah saban tarasa
Nyoё keuh cobaan rakan meutuawah
Haté beu tabah ikhlas ngön rela
Tanyoё meulakèe teuntèe jeut sa′ah
Nibak Potallah nyang Maha Kuasa
Zikir Seulaweuet jeut jeut meunasah
Beut kalam Allah beule meudô′a
Semoga acèh salèh bi Allah
Ji′ôh musibah beugadoh bala
Meunan keuh sabé bèk pré di babah
Ingat keu Allah tanyoё syédara.
Sekian dari Cek Medya Hus
HABA NASIHAT (Cegah Corona)
Syair : Fuadi Mahadasa
Assalamuꞌalaikum kawôm sinaroё
Agam ngёn binoё tuha ngön muda
Na bacut haba lôn rika rampoё
Nibak watèe nyoё wahé syédara
Jinoё meulanda bala ka sampoё
Unanggroё tanyoё virus kateuka
Covid 19) sikureueng blah wabah that paloё
Ta ceugah jinoё bèk jak ulua
Taduek di rumöh wahé rakan droё
Kareuna nanggroё dalam bencana
Meunan himbauan rakan keu tanyoё
Rata jeut sagoё di rumöh saja
Virus corona bahaya hꞌan bagoё
Tanyoё meupaloё meunyö ka teuka
Kumeun meujangkét sakét lam asoё
Le that nyang kawoё u alam baqa
Wajéb tapatéh peurintah dokto
Pemerintah tanyoё serta Ulama
Meunyö ta langga meunyeusai dudoö
Virus jameun nyoё keubit bahaya
Bak ramè ramè bèk na geutanyoё
Han jeut duek toё toё tapeugah haba
Virus meunula ateueh geutanyoё
Ingat hai adoё kawôm syédara
Di công bak langsat tok tok beuragoё
Di công bak panjoё tupè meu dôda
Taduek di rumöh wahé sambinoё
Bèk tajak saho hai bungöng jeumpa
Di ulôn tuan ka lapan uroё
Di rumöh sinoё ta karantina
Lôn duek di rumöh hꞌana jak saho
Nacit sigo go teubiet ulua
Cara geuceugah peugah lagèe nyoё
Bèk saho saho lam kawan bèk na
Karna meunyö na ka keunong jih nyoё
Nyö ngön tanyoё toё di langkot sigra
Peue lom nyang ban woё di lua nanggroё
Payah ureueng nyoё geujak pareksa
Bèk jeut meunular bak aduen adoё
Maka jeut sagoё ramè ramè bèk na
Taduek di rumöh tanyoё samlakoё
Baca tiep uroё qur′an mulia
Ilmèe agama wajéb meurunoe
Peue lom karap toe buleuen puasa
Silaturrahmi ngon syédara droё
Hp bak jaroё neu halo sigra
Ngon keluarga hꞌana jeut tuwo
Kadang di ranto han trôh tagisa
Beuta meudôꞌa sigra lé jinoё
Bak Allah sidroё ta mohon pinta
Beujiôh bala di dalam nanggroё
Virus bèk lé toё e ya Rabbana
Di langèt manyang na mata uroё
Cahya ubumoё ngon peutrang dônya
Haba peuingat meuhat cit oh noё
Meuꞌah keu lôn nyoё wahé syédara.
Pengarang : Fuadi Mahadasa
CORONA
Syair : Cek Medya Hus
Alhamdulillah meumuji Tuhan
Allahurahman Maha Kuasa
Pada Rasulullah Salawat dan salam
Penghulu alam Rasul mulia
Negri kita negeri peradaban
Ciptaan Tuhan yang Maha kaya
Di saat ini Covid 19, pencegahan
Yang melanda insan seluruh dunia
Virus corona di cina wuhan
Banyak nya insan meninggal dunia
Seluruh negeri ngeri tularan
Semua insan harus waspada
Semua negara sudah di rasakan
Cepat penularan melalui manusia
Virus corona sangat menakutkan
Sudah banyak korban seluruh negara
Tanda tanda kena menurut kedoktoran
Hidung tersumbat kadang juga sakit kepala
Flu dan pilek, infeksi pernafasan
Bisa menyerang siapa saja
Ada terinfeksi virus tiada sakit dan demam
Masih kuat badan seolah sakit tiada
Maka dari itu penting pemeriksaan
Untuk kejelasan apa ada gejala
Virus corona melanda insan
Kita sekalian harus waspada
Ikuti perintah juga himbauan
Untuk keselamatan kita semua
Pemerintah cepat melakukan
Untuk pecegahan virus cona
Memutus rantai virus penularan
Hindari keramaian kerumunan masa
Jaga jarak jangan berpegangan
Periksa kesehatan bila curiga
Empat belas hari masa ujian
Kita sekalian di rumah saja
Sekolah libur dan juga pesta perkawinan
Acara keramaian jangan di buka
Akses darat laut udara penerbangan
Buat aturan harus di tunda
Sampai pada masjid ada penutupan
Shalat puji Tuhan jamaah tiada
Mencegah virus begitu aturan
Semua pimpinan tujuan sama
Untuk kita hindari virus penularan
Kemana jalan masker harus ada
Sering tiap hari mencuci tangan
Jaga kebersihan lingkungan kita
Tubuh kita perlu ketahanan
Kosumsi makanan nutrisi terjaga
Sering olah raga jaga kesehatan
Itu kekuatan kalah corona
Itu usaha kita lakukan
Tapi kesimpulan kita berdoa
Pada Ilahi mohon perlindungan
Dari ancaman virus corona.
Setelah shalat memuji Tuhan
Kita dôꞌakan memohon pinta
Jauhkan wabah yang menimpa insan
Mohon ya Rahman jauhkan bala.
Pengarang : Cek Medya Hus
CEGAH WABAH CORONA
Syair : Ahadi PJ
Assalamuꞌalaikum warahmatullah…
Saleuem ukhuwah keu rakan lôn bré
Nyang saleuem meuhat sunat geupeugah
Nyang jaweueb kasah wajéb suꞌôt lé
Lheueh ta meusaleuem takheun bèk salah
Alhamdulillah laju bèk tapré
Pujoe ngon syukur keu sidroe Allah
Nyang Maha meugah Nyang Maha adé
Seulaweuet saleuem keu Rasulullah
Pang ulèe meugah Nabi nyang akhé
Seureuta sahbat ta ingat beusah
Keuluarga Rasulullah seureuta sabé
Para ulama teuma lheuh nyan sah
Tanyoe geupapah bèk rôh buet jahé
Seulaweuet dôꞌa beuna tiep saꞌah
Lakèe bak Allah lam ridha sabé
Deungon beureukat lôn kheun Bismillah
Bacut neuk kisah di dalam caé
Beu ék seuleusoe rampoe lôn ulah
Covid 19) sikureueng blah bacut lôn rawé
Bukon that sayang tapandang tiwah
Sayeuep ka patah jipo hanꞌék lé
Nyan saboh virus kadeuh meuwabah
Vaksin meutuah goh soe ék piké
Di nanggroe wuhan, han ék peusiblah
Hingga meuluwah rata sagoe bé
Kareuna virus mkhluk tan leumah
Le that hai ayah nyang kabéh maté
Katrôh bak tanyoe jinoe meuwabah
Virus meuluwah sabang maroeké
Jinoe geuhimboe lé pemerintah
Laju taceugah kuta ngön di glé
Seugoh lom keunöng jitamöng wabah
Himauan geupeugah Lckdown laju lé
Seungap di rumöh bèk syꞌèh syꞌöh leupah
Bèk jak jeut saꞌah tajak meu dé dé
Anjuran dokto tanyoe bèk bantah
Jaroe geuyue rah beuna lam sabé
Sihat tajaga badan beu gairah
Lingkungan beuceudah kuto bèk na lé
Lam kawan ramè keunan bèk langkah
Hastag, di rumah geu info tanpré
Kareuna mandum untuk menceugah
Bèk na tabantah rakan bohaté
Meunan cit aneuk ranto lua daerah
Bèk ilèe woe langkah ban galak haté
Dak phét sengsara saba meutuwah
Segohlom covid 19) nyoe putôh ranté
Dôꞌa tiep uroe tanyoe bak Allah
Peunyakét nyoe bagah laju meugulé
Peue lom buleun puasa cit ka rap leumah
Buleuen ibadah meudôꞌa bèk pré
Talakèe beujiꞌôh bèk trôh lé langkah
Peu mantong wabah,beugadoh saré
Talakèe tanyoe jinoe bak bak Allah
Jiꞌôh musibah lam ridha sabé
Haba ka leungka Alhamdulillah
Beurayek meuꞌah meunyö tan oké
Maklum ulôn nyoe meurampoe goh pah
Goh lom that ceudah nibak meurawé
Banda Aceh 5 April 2020
Abdul Hadi Pidie Jaya (Ahadi PJ)
COBAAN ALLAH
Syair : Keuchik Ramli
Assalamuꞌalaikum warahmatullah..
Saleuem ukhuwah nyang that mulia
Saleuem dari lôn seunusôn kisah
Sambôt meutuah saudara lingka
Nibak awai phôn lôn pujoe Allah
Alhamdulillah nyang ulôn baca
Nyang peujeut bumoe meubagoe ulah
Langèt nyang ceudah dan makhluk dumna
Kirém seulaweuet keu Rasul Allah
Nabi nyang meugah pang ulèe dônya
Deungon sahabat nyang that meutuah
Bantu Rasulullah peukong Agama
Dan keluarga beuna hai ayah
Lheuh nyan tamah para ulama
Seulaweuet saleuem kheun muqaddimah
Wajéb meutuwah peue tameuhaba
Diyub jambô seueng ureueng meu asah
Untuk geujak cah naleueng toe paya
Neubri beureukat, haba lôn kisah
Beuna paedah keu ureueng dumna,
Bukon that sayang bungöng geulima
Lam khueng baroe sa lurôh bak tangké
Lôn karang bacut, keuhai corona
Neucok syédara keu ubat haté
Memang virus nyan jinoe cit kana
Pakriban cara jinoe bèk trôh lé
Patéh atôran kiban nyang kana
Meubèk talangga wahé bohaté
Bèk berlebihan atôran that raya
Atôran Rabbana kadang ka tapré
Tanyoe Islam iman bèk goga
Bèk oh trôh bala sibôk rapmaté
Meubèk that takôt ngon virus corona
Keu Allah nyang Esa ta ingat sabé
Mantong le rahmat di ateueh dônya
Bandéng ngon bala bacut Allah bré
Meunyan cobaan Allah karônya
Walaupun dônya ka guyang gayé
Bandéng ngon salah ureueng lam dônya
Mantong goh na seubandéng neubré
Jinoe taingat meuhat saudara
Peue salah gata taci seumiké
Nyang mbông ngon congklak kabéh bak gata
Bak hi nyoe dônya cit gata gulé
Ban bacut virus katrôh udônya
Meugok gok manusia hana teungeut lé
Ban laén ureueng ta kheun karantina
Virus corona bèk menular lé
Ban reubah ureueng teu gageueng sigra
Soe bantu hana sosial tan lé
Takôt meunular virus bahaya
Meunan manusia jinoe kalahé
Beurijuek breueh ateuh bak mamplam
Tulô meukawan dalam bak padé
Sibôk pemimpin uroe ngon malam
Peugot atôran rakyat geupiké
Nyoe ka berlaku jinoe jeum malam
Ka geutôp jalan siat bèk jak lé
Yue duek di rumöh inöng ngon agam
Bèk jak lam kawan tuwah bohaté
Kareuna virus le that lam reugam
Hana tatujan ka meunular lé
Όh geupeuingat tanyoe kon geutham
Seubab hai rakan bèk trôk bak maté
Geumita cara uroe ngon malam
Beuleumah jalan virus bèk na lé
Cara geuceugah geupeugah meunan
Tapi mandum nyan Allah nyang tukré
Bungöng jeumpa di sampéng kama
Putéh wareuna bèe mangat kon lé
Nyo ta usaha wajéb cit beuna
Bèk sampoe gata salah seumiké
Peugot atôran cit wajéb beuna
Nyang bèk meulangga ngon Rabbul qadé
Bèk seubab virus tamöng nuraka
Neukira kira tuwah bohaté
Neu peukong iman di dalam dada
Beu ék trôk taba sampoe an khé
Beuglah talingkeue titi nuraka
Tamöng syiruga beu ék meusampé
Kuta cot gli na waduk raya
Meujan na teuka ureueng keumawé
Èt noe karangan lôn tuan rika
Meunyö meuguna neutrôh lam haté
Nyö kira salah bèk neu peuguna
Bèk jeut keu dôsa oh uroe pagé
Nyang got teungku cok cocok bak baca
Nyang hana makna keubah bèk ngui lé
Sekian Dari : Geuchik Ramli Lamtui
Kuta Cot Gli Acèh Besar
4 April 2020
CORONA KATRÔK
Syair : Cek Abrar Lapindra
Assalammuꞌalaikum saleuem lôn petrôk
Kuta ngon pucôk mandum rakan
Di dalam caé rawé lôn pakhôk
Haba lôn peutrôk dalam karangan
Hab lôn rampoe meunoe meupucôk
Caé lôn peutrôk keu bandum rakan
Virus corona nyan jinoe katrôk
Ata Allah jôk ingat dum insan
Meubagoe bala takalon katrôk
Ta eu bak pucôk bumoe rap karam
Ibadat beuna bah ka putéh ôk
Bèk lam buet kutôk ingat dum taulan
Rata dum lungkiek keuchik kasibôk
Lockdown ka geujôk macam atôran
Ladôm setuju laju geu tôp rhôk
Na nyang han anggôk geukheun bèk meunan
Kiban tapiké akhé nyoe katrôk
Barôh ngon pucôk bala trôh tiep jan
Nyang ladôm seudéh reugéh meutumpôk
Oh corona trôk keurija katan
Pike keu breueh bu nanggroe ka harôk
Masa cit katrôk dônya lagèe nyan
Ho ho ngon tajak tapak han lé trôk
Ka hayuet bé ôk keurija pih tan
Saweueb corona saho han lé trôk
Kuta ngon pucôk putôh hubungan
Teubiet bak keudè nyan pih rè bé ôk
Meujan gob tawôk di kheun bèk keunan
Di sangka tanyoe virus nyoe jak jôk
Keubit ka suntôk pakré ban macam
Nyang cukôp parah reubah meu antôk
Ureueng hana trôk bak ureueng pinsan
Di sangka corona meulanda batôk
Tim medis goh trôk tanyoe bèk keunan
Nyan dum ka parah wabah meukachôk
Tunöng ngön pucôk teungöh lagèe nyan
Di pemerintah bagah geutawôk
Jaga droe bé ôk teubiet meujan jan
Saweueb corona hana meujan trôk
Bak beursén batôk ka penularan
Maka himbauan kadang rôh geujôk
Tapatéh bé ôk nyan pencegahan
Asai bèk panik meutiet lam kudôk
Όh bala katrôk ka meupékéran
Bèk sagai tanyoe gadôh lam suntôk
Mata abéh lhôk rusôk habéh lham
Bah pih di lockdown rata jeut lingkôk
Tanyoe bèk suntôk ibadat keu Tuhan
Beu geupeujiôh peunyakét nyang brôk
Talakèe bèk trôk keu ureueng Islam
Ratéb ngön dôꞌa ta beuet jeut suntôk
Bak Allah peujôk meulakèe tiep jan
Talakèe dôꞌa nanggroe bèk harôk
Bala bèk lé trôk uroe ngön malam
Beu geupeujiꞌôh ta eun ija brôk
Peunyakét budôk bèk na lam alam
Meuputie karang tangké bungöng jôk
Kawé bak padôk tuwo lôn kambam
Bah pih lam malam sabé lam sibôk
Caé lôn pakhôk bah pih si uram
Hana lôn rika panyang that pakhôk
Lôn takôt teurhôk meucawo kalam
Bah keuh jan laén salén lôn kurôk
Bah panyang bé ôk asai bèk bosan.
Wassalam : Cek Abrar Lapindra
CEGAH VIRUS CORONA
Syair : Muliadi Bayeuen
Assalamuꞌalaikum saleuem ulôn bré
Kuta ngön di glé keu waréh sampèe
Pujoe keu Rahman Tuhan Nyang Adé
Takheun beusabé lam tiep tiep watèe
Keu Muhammadan junjungan akhé
Seulaweuet bèk pré pada pang ulèe
Keu al ngon sahbat meuhat beusaré
Ulama bèk cré nyang bré ileumèe
Bismillah yamanan pikéran meublé
Bèk sampé reulé haba meu padèe
Ceugah corona rika ta caé
Virus kalahé keunoe trôh teuntèe
Virus corona bahaya kon lé
Paru paru reulé tubôh teuh layèe
Brat that ngeri inkubasi hasé
Peut blah uroe sampé virus meusilèe
Nyo lewat bak nyan kadang han asé
Virus nyan tanlè dokto peuteuntèe
Kekebalan tubôh virus pih maté
Nyan keuh tapiké atôran peureulèe
Le that han patéh langgèh ngon deugé
Dudoe ka maté ka payah seubèe
Keupeue lom guna lockdown peu hasé
Meunyö ka dilé virus meusilèe
Maka taceugah bagah beuhasé
Beusaré saré meunoe ta lagèe
Taduek di rumöh dak mèh möh lahé
Bèk jak meudé dé ukudè meurèe rèe
Ta eu binèh krueng udeung geu kawé
Ateueh kayèe glé di lumpat himbèe
Meunyö tajak jak jarak beu tapré
Bukon sipadé simètè teuntèe
Kadang kegiatan bak gudang toké
Rah jaroe bèk pré bèk kuto abèe
Jaga keluarga, kebersihan tapiké
Kesehatan sabé pareksa teuntèe
Sabeueb lawét nyoe bak tanyoe lahé
Na nyang odp payah meuadèe
Ureueng nyang bantrôh jiôh bukon lé
Hana taturé paréksa dilèe
Ubak petugah talapur saré
Deungon gléh haté bèk malèe malèe
Demi mencegah ngat bagah hasé
Peu putôh ranté virus beu padèe
Langkah mencegah wabah bèk na lé
Medis peusampé ureueng na ilmèe
Nyan cara usaha manusia hasé
Tapi nyang tukré cit Allah teuntèe
Sampéng menceugah pemerintah bré
Bak Allah bèk pré tanyoe meulakèe
Karna mandum nyan bala ka lahé
Mandum Tuhan bré tanyoe bèk seudèe
Bah pih ta tapih keu ih ka deugé
Hudép ngön maté Allah peuteuntèe
Namun di tanyoe beu haté haté
Tawaqal oh akhé ikhtiar dilèe
Di po beuragoe taloe binèh glé
Ateueh meuranté dicoh boh kayèe
Όh noe meumada haba lôn rawé
Meuꞌah bohaté nyö tan got lagèe
Maklum lôn tuan karangan uké
Barô lôn tukré meurunoe bak gurèe
Salah ngön silap meuhat na sabé
Meuꞌah beuneubré ulôn meulakèe
Wassalam
Pengarang : Muliadi Bayeuen
Bayeuen 4 April 2020
DAMPAK CORONA
Syair : Septiawan
Alhamdulillah Allah ya Rahman
Qudrah Tuhan han ék soe sangga
Mangat sakét anggota badan
Mandum cobaan geutanyoe hamba
Peue lom lawét nyoe jinoe hai rakan
Teungôh ancaman virus corona
Covid 19) sikureueng blah phôn dari wuhan
Jinoe penyebaran rata negara
Aneuk leuk kutru meusu công saban
Ateueh bak asan tulô tꞌöt subra
Jinoe takalon wahé e rakan
Meumacam ragam dampak corona
Bak masa tanggap pagap virus nyan
Peugot himbauan lé penguasa
Na ladôm patéh ladôm langgéh h′an
Macam anggapan bak manusia
Demi mencegah wabah hai rakan
Ikôt atôran gampông ngon kuta
Meumacam meuproe masa nyoe insan
Suai ikotan himbauan kana
Di ureueng gampông nyata ta eu ban
Na pageue simpang na ladôm buka
Macam berita tentang himbauan
Ureueng dum bimbang dusôn ngön kuta
Na ladôm peugah sidéh di peukan
Laén kecamatan laén berita
Hoax ngon nyata tan geu tu′öh ban
Macam tambahan publoe berita
Nacit beurita gura meujan jan
Na ureung pinsan peugah corona
Na nyang ka keunöng bingöng meujan jan
Di peugah gopnyan meninggai dônya
Na nyang ka peugah sedia kuburan
Untuk korban virus corona
Mumang tapiké lahé pikéran
Na ngön jeum malam ka di yue ronda
Na nyang bandara yue tôp penerbangan
Kareuna rot nan peunyakét gop ba
Na nyang dukông langsông masanyan
Tapi penerbangan hana ji tunda
Na ladôm gampông bagi bantuan
Le that amprahan khabaran haba
Pemerintah nanggroe na pengumuman
Untuk bantuan dampak corona
Di ureueng gampông deungö haba nyan
Keutanyoe pajan di bagi jeumba
Masalah nyoe jinoe jelaskan
Supaya aman bèk riyôh dumna
Beuleumak kuwah tamah santan
Mangat masakan beupah ngon sira
Beurita jeulah beupah himbauan
Bèk lé mencekam rakyat lam désa
Memang peunyakét geuyue hindarkan
Bak tanyoe insan beuna usaha
Tapi ta peugah beupah sasaran
Bèk na tambahan bak ujông haba
Secara bijak beusanton sopan
Dan lom bèk plin plan mumang rakyat bla
Cara meu atô beule kebijakan
Oh rakyat ta tham solusi beuna
Bèk yue duek di rumöh leumöh ngön badan
Patéh atôran ceugah bersama
Tapi laôt udara buka pelayaran
Lockdown lagèe nyan rakyat sengsara
Taceugah peunyakét bèk sakét badan
Bèk wab ceugah nyan laén lom teuka
Peue lôm sosial takalon macam
Bak ceugah virus nyan jiôh that beda
Harapan tanyoe jinoe hai rakan
Beuna kesimpulan keudroe takira
Barang gapeue bala melanda insan
Hanya keuh Tuhan nyang thèe sigala
Tanyoe tan daya na deungön tan
Sakét deungön hꞌan kheundak Nyang Kuasa
Bak tanyoe usaha minta pertolongan
Yang qabulkan Allah Nyang Esa
Jinoe tapiké saré beusaban
Kiban tanggapan seulama bala
Peunyakét beujiôh, bèk layôh insan
Ikôt atôran rakyat bèk that jra
Musibah nyang kana beuna ingatan
Nyoe peringatan keutanyoe dumna
Peue keuh ék sadar geutanyoe insan
Lam perbuatan le nyang meulangga
Talakèe dôꞌa bak sidroe Tuhan
Beujiôh virus nyan e ya Rabbana
Rakyat jeut meubuet dum kegiatan
Bèk lé yo yo hꞌan haté lam dada.
Kuta Jantho bako hana ban
Kanto di sinan meu atô banja
Όh noe keuh caé rawé karangan
Nyö na salahan meuꞌah beuraya.
Lamleupung 5 April 2020
Pengarang : Septiawan Kuta Cot Gli
CORONA UJIAN TUHAN
Syaꞌir : Muhammad Pijay
Assalamuꞌalaikum kawôn ngon rakan
Inöng ngon agam tuha ngon muda
Saleuem ukhuwah dalam karangan
Keu bandum rakan ban sigom dônya
Alhamdulillah, pujoё keu Tuhan
Nyang peujeut alam langèt ngon dônya
Seulaweuet saleuem keu Muhammadan
Pang Ulèe alam Rasul Mulia
Kruseumangat rahmat bak Tuhan
Uroe ngon malam geutanyoё rasa
Gasien ngon kaya hana bedaan
Meunyö bak Tuhan geutanyoё sama
Di công bak pineung umpung cém subang
Ateueh bak seuntang aneuk cémpala
Nibak watèe nyoё, nyoё lôn keumarang
Caé nyoё teuntang virus corona
Virus nyoё katrôh bak tubôh insan
Lethat meutimphan maté manusia
Asai ka keunöng bèk tanyöng kiban
Le woё bak tuhan takalon nyata
Virus bahaya beuna ta tuban
Saboh cobaan keu tanyoё dumna
Nyang ladôm bingöng inöng ngon agam
Takôt virus nyan saho jak hana
Teungöh geu uji tanyoe lé Tuhan
Gampông ngon peukan teungoh lam bahya
Kareuna tanyoe lam bumoё Tuhan
Inöng ngon agam cukôp that subra
Cukôp that laloё uroё ngon malam
Ramè dum insan sibôk ngon dônya
Ladôm bak keudè ngon hp sinan
Όh watèe azan seumbahyang hana
Seumbahyang mugréb kasép bak jalan
Kadang meujan jan di ateueh honda
Ladôm bak cafee sabé di sinan
Game onlene nyan cit hana reuda
Di muda mudi cit le nyang meunan
Meunancit saban ureueng ka tuha
Meunyö ka candu bu jeut dak tan
Meunan keuh macam laloё manusia
Le aneuk inöng dum taloё jalan
Meupasang pasang di ateueh honda
Adak di pubuet jeut zinaan
Kadang hai rakan meusoё tham hana
Meunyö buet maksiet leukiet hana ban
Rap bansaboh nyan hana soe publa
Sabu ngon ganja narkoba lheuh nyan
Ka ban saboh nyan keunöng pemuda
Ateueh bak tampu di meusu tiwah
Ateueh bak panah aneuk leuek kuwꞌa
Jinoe hai polém salén lom kisah
Buhu ta ubah ngat lagak rika
Jinoё ka beutoi bandum ka leumah
Peue nyang geupeugah lé ureueng tuha
Sidroe nyang taluem mandum meugeutah
Sidroё nyang salah mandum ta theun jra
Virus corona nyoe saboh wabah
Nyang phôn that meugah di wuhan cina
Hingga jeut nanggroё jinoё ka leumah
Ka le musibah maté manusia
Meunyö tapiké wahé e ayah
Kutukan Allah ateueh rueng dônya
Karna awak nyan iman tan bédrah
Mandum di seupah peue peue nyang hawa
Dan ureueng islam sayang sileupah
Dipoh rô darah ka di inanya
Aneuk miet cut cut seudih that leupah
Ngön ma di peuglah alèh ho jiba
Nyang inöng inöng ladôm di reupah
Tubôh di ramah ka di perkosa
Beut awak jahé bakhé si leupah
Seudih meuleumpah hana soe bela
Mungkén nyoe mandum kutukan Allah
Geu peutrôn wabah geunoё udônya
Dum alat cina canggéh meuleumpah
Han ék di sanggah kuasa Rabbana
Beuthat di cipta virus di peugah
Mandum grak Allah nyang po kuasa
Tanyoe manusia hana bak peugah
Bandum bak Allah tan deungön na
Di kota banda jalan le leupah
Nyo salah arah meu puta puta
Bacut teuh haba taputa arah
Mantong ta kisah teutang corona
Teungöh lôn duek duek lôn poh beurakah
Ngön rakan meutuah saboh sikula
Deungö pengumuman nyan di meunasah
Mandum geupeugah geuyue waspada
Teuntang virus covid 19) si kureueng blah
Jinoe ta ceugah lé tanyoe sama
Beuta jaga droe bèk toe toe leupah
Lheueh nyan geupeugah jaga keluarga
Ho ho ngon tajak geuyue tôp babah
Peusan pemerintah di rumöh saja
Teumpat keramaian nyan bèk talangkah
Meunan geupeugah dusôn ngon kuta
Warông geuyue tôp stop bèk peuhah
Umi ngon ayah kesehatan jaga
Ureueng nyang teuka pareksa bagah
Kadang na wabah di karantina
Meunan pengumuman rakan meutuah
Wajéb ta ceugah le tanyoe dumna
Bèk sampé tanyoe paloe ngon wabah
Virus that parah bagah menula,
Mari geu tanyoe jinoe hai ayah
Patéh perintah siat tasaba
Seungap di rumöh peut blah uroe pah
Meunyö geu tamah geupeugah teuma
Jinoe keuh masa beuna meu ubah
Tanyoe keu Allah beuna taqwa
Bèk lé lam laloe rugoe si leupah
Dalam musibah ibadat hana
Meunyö barokon takalon ulah
Laloe meuleumpah ibadat hana
Tapi oh jinoe peutoe ngon Allah
Tapujoe Allah oh trôh kutika
Nyoe saboh tanda geubi musibah
Tacok hikeumah le tanyoe dumna
Nyoe keuh teguran nyan bak Po Tallah
Ingat meutuah tuha ngon muda
Όhnoe keuh dilèe teuntèe lôn kisah
Meunyo na salah meuꞌah syédara
Nyang got neucok nyang brôk neupinah
Nyang na paedah nyan neupeuguna.
Wassalam dari : Muhammad Pijay
PEUNUTÔP
Alhamdulillah kisah ka tamat
Nyang kamoe surat nibak watèe nyoe
Haba mencegah virus nyang gawat
Dalam hikayat meucaé rampoe
Salah ngon beuna beuneu peuteupat
Tuléh meudhap dhap kadang cit paloe
Bak watèe laén salén lom meuhat
Barô peuteupat pakhôk meugantoe
Kasép keuh haba nyang ka meusurat
Meuah raya that bak Seueng Samlakoe
Kadang le salah hana pah mangat
Maklu hai sahbat teungöh meurunoe
Na nyang muda anggota seumurat
Hana got meupat pakhôk lam rampoe
Peue lom ka tayue meukarat karat
Han meuteumèe ralat kakeuh lagèe nyoe
Keu BPNB meu oké that that
Kageutém meuhat tampông haba nyoe
Geutém usaha beuna mamfaat
Dokumen got that arsip nanggroe
Hasé karya budaya adat
Haba teusurat meunurôt nanggroe
Informasi bangsa ka kamoe catat
Timu ngon barat haba peusampoe
Manok di ku uek gabuek leupah that
Cot uroe peuingat geu bandum tanyoe
Haba peunutôp peucukôt siat
Jan laén meuhat meusambông rampoё
Sekian wassalam dari Pengarang: Cek Medya Hus
Geuchik Ramli, Fuadi Mahadasa, Septiawan, Ahadi PJ,
Abrar Lapindra, Muliadi Bayeuen, Muhammad Pijay
Dan di dukung oleh semua anggota Seueng Samlakoe goup
Cot Puklat Blang Bintang Acèh Besar
12 Syaꞌban 1441 H. 6 April 2020 M
0 Komentar